SHILLONG: Da·o ong·enggipa State Reservation policy gitcham ong·jok aro da·oni gadang aro nangengani kri uko gital dakna nangenga ine gital daktaichina chadambe dol dabrigrime mijal Sonibar salo signature campaign ong·atgipao jak on·paaniko adita man·aha.
Signature campaign-ko Mawkhar Taxi Stand-o ong·ataha aro bang·en bak ra·paaniko nikaha aro agriculture poraigipa Bari Pyngrope ong·atgipana didiani gita kamko ka·aha.
A·dokni Khasi, Jaintia aro Garo ia mongsonggipa a·brini jat gittamni gisepo cholko apsan on·a da·o dongenggipa reservation policy man·jaenga aro bilsini bilsi manderang jelbra-jelsurorobaenga aro ia policy gitcham ong·jok namedake melijaengaha uni gimin uko sorkarini nipilangako aro dingtangatna nangchongmotengako nangnike Pyngrope aganaha.
Da·o Khasi aro Jaintia-na per cent 40-ko on·engon, Garo-naba 40 percent-ko on·enga aro bangki 20 per cent-ko gipin ja·manchakgipa ST aro SC jat-rangni gisepo sualenga.
Ia mamla darang jatni kosako namnikgijani ong·ja indiba neng·nikani ong·enga jekon chadamberang chagrongenga aro bilsini bilsirangna neng·nikani ong·roroanggen ine Pyngrope agandapaha.
Signature campaign-ni gimin aganao, uni ka·dongsoana baten uni ong·atgipa campaign-o jak on·paaniko man·aha aro North Shillong MLA Adelbert Nongrum-ba uko grone agangrikaha ine ua aganaha.
Political-ni gita sikani komienga, ua obostani gimin pilak MLA-rang chanchigrikako nangnike Pyngrope aganaha.
Ia campaign-o reservation policy-ko gital dakako aro nipiltaiako chadamberangni nangnikengako aro soi ka·anichi ra·chakani sakkiko nikaha ua aganaha.
Policy-ko walgimikko dingtangatna man·jawa chakpachina Pyngrope chadamberangko mol·molaha, bilsi 50-na ua obostako indaken ong·angna on·jachina chadamberangko mol·molaha aro hai an·ching ka·sinsin re·mikkangna aro namroro-silroroangna ine ua mol·molaha.
“Chanchichipe Grade-A-na na·a high technical-o namen changa-sapaniko nangenga una an·chingo sepango reservation dongjaode jat gittamna 80 per cent-ko dongaiode maikai kamko man·pagen, a·bachenggipa policy-ko saobasa kamko man·aignok indiba uamangde man·pajawaha indake a·dokni apsan man·gni gadangko chadamberang gimatenga,” ua aganaha.
Indake ong·engon Poet aro writer, Avenr Pariat-ba who signature campaign-ona re·ange chek ka·e nieaha, “Ian gitchamgipa mamla ong·a aro bang·a dingtangatna nanganirang donga ine ua aganpaaha.
