TURA: Garo Hills Autonomous District Council (GHADC)-na ma·mong sorkarini chamatgipa tangka paisarangko jakkalsreta ine uni kosako MDC-rangni chakatanina GHADC-ni gitcham chief executive membor (CEM) Benedic R Marak, suk ong·gijaniko parakatenba, ia tangka paisarangko ua jakkalsreta ong·jachim indiba GHADC-o kam ka·enggipa manderangni dormaharangko on·na gitasa jakkalsochengachim ine talataniko on·angaha.
Sonibar salo an·tangni kosako no-confidence motion-ko dake CEM-ni kamoniko ra·galatani ja·man kobor ra·timgiparang baksa agangrikengon, GHADC-ni executive committee-ko rikchengani somoion ua dingtang dingtang dolrang aro GHADC-o kam ka·enggipa manderang baksa apsan tom·e chanchirimani ja·man, kam ka·enggiparangni dormaharangko on·na gita uni EC ku·rachake, dormaharangko on·na a·bachengaha aro da·o ia EC-ko chalaiani jaskusan ong·kuengoba kam ka·giparangna ja 13-ni dormaharangko on·na man·ahachim ine Marak parakataha.
“GHADC-o kam ka·giparangni dormaharangko on·na gita angni rake kam ka·anio ma·mongoni chamatgipa tangka paisarangko jakkalsretaha ine MDC-rang, angni kosako matnangna a·bachengaha indiba ia tangka paisarangko anga jakkalsretbebegenchimode an·tangni man·gnina jakkalsretanisa ong·genchim. Ia tangka paisarangko anga district council-ni nanganasa jakkalsochengahachim,” ine GHADC-ni gitcham CEM aro Raksamgre-ni MLA aganaha.
Dingtang dingtang kamrangna sorkarini chamatgipa tangka paisarangko Finance department, divert ka·na bil donga aro skangonin tangka paisarangkode indaken divert ka·e kamrangna jakkalenga ineba Marak parakataha.
“Batanggimin somoirangoba apsan daken dingtang dingtang kamrangna chamatgipa tangka paisarangko gipin kamrangna jakkalsochengarang donga indiba ua somoio mai kamrangna tangka paisarangko divert ka·a ukode ma·sija. Ia chango anga Jal Jeevan Mission ba songo noko rongtal an·talani kamrangna sorkarini chamatgipa tangka paisarangko ja·mano gipin cholrangchi gapatskana gita district council-o kam ka·giparangni dormaharangko on·sochengna gitasa jakkalahachim,” ine Marak aganaha.
Uni kosako iandake matnanganiara, jatna aro GHADC-o kam ka·giparangna ka·sagijaniko mesokani gitasa ong·skaengaha maina ua uamangni duk mikchirangko nikna sikjaesa je cholchiba dormaharangko on·na jotton ka·ahachim ineba Marak parakataha.
Executive Committee-o an·tangni ka·rimskarang baksa maming agangrikani gri skatang kamrangko ka·a ine an·tangni kosako matnanganirangkoba gitcham CEM raken jegalataha.