TURA: A∙chik A∙songni Primary education-ko jako ra∙china A∙dok sorkario dabiani bilsi 30 gapna gitiko, All Garo Hills Primary School Teachers’ Association (AGHPSTA) uni neng∙nikanirangko a∙dok sorkarina uiatna aro nangnikanirangko uo dabina gita December 31, 2022 tariko Tura Dakopgre Field-o ‘Sit in Dharna ba Protest’-ko ong∙ataha. Ia Association-ni neng∙nikani aro dabianirangoni mongsongbatgipa mingbri donga jekai, service regularization, government teacher ong∙na kraoba non-government teacher-rang ine chanako man∙giparangko government teacher chanchina, Booth Level Officer (BLO)-na primary teacher-rangko jakkalako dongtongchina aro teacher saksangipa schoolrango chu∙onga gita teacher-rangko on∙dapchina ong∙a. A∙chik A∙songni ki∙tikbrioni ia Dharnao bakko ra∙na gita sak hajal AGHPSTAni member-rang tom∙baaha.
AGHPSTA-ni President, M.Ch. Marak-ni aganani gitade, Association ia dabianirangko dingtang dingtang gadang aro bimangrango batanggimin bilsirango sorkarina uiatahachim jekai da∙o ong∙enggipa Skotong Minister, Conrad K Sangma-na 2018 bilsio memorandum-o on∙aha. Memorandumo neng∙nikani aro nangnikanirangko janape ku∙sikchiba agangrikaha jeon kraa ba kragijaniko nigrike kam ka∙na gita ku∙chakataha. Uni ja∙mano mamung dingtanganiko nikjae Turani MP, Agatha K Sangmanaba Raksamgre-o AGHPSTAni annual general conference ong∙o memorandum-ko on∙aha. Indake ong∙ani gisepoba mamung dingtangani nikjaon Covid19-na jajrengna nanganirang dongoba dilgiparang A∙dokni Skotong Minister baksa Tura aro Shillongo gronggrike agangrikanirangko dakaha aro gronga changantian ka∙dongatani kattarangko man∙achim.
Service regularize ong∙gijagipa govt. primary teacher-rang Assured Career Progressive Scheme (ACPS)ko man∙ani chol dongja, non-govt teacher ine chanako man∙giparangba ACPSkosan ong∙ja medical re-imbursement-koba man∙jachim. Uamang bank-oniko loan ra∙naba neng∙nikaniko man∙a indiba service regularize ong∙giparangde iarang gimiknan neng∙ani dongjachim. Da∙o non-govt. teacher ine chanako man∙giparangba dormahade apsankon man∙enga, apsan skianikon on∙engachim. Primary teacher-rang BLOna jakalako man∙e neng∙nikanirangko bang∙en man∙a maina uamang on∙dapgipa kamkoba rake ka∙e matchotatna nangachim. Indiba minggni kamrangna somoiko nanga gita tik ong∙e jakkalna neng∙beani ong∙a, skul ka∙anirang peng∙pangatako man∙achim. Minggipinara, a∙gilsakni seng∙a-man∙anirang pilak gitan aro pilakchin tang∙dororoengon school-o skianirangba somoini kri ong∙pana nangenga, apsan daken a∙dok sorkarini chalaigipa schoolrangonikoba namgipa education-ko dabia. Indake ong∙genchimoba sorkarini chalaienggipa schoolrango da∙alonaba teacher saksanchi skie on∙giparang bangven dongenga. Class ge∙prakna komibeoba teacher sakprak dongna nangtelachim ine teacher-rangni dol kusi ong∙gija aganaha. Unigimin, teacher on∙dapchina dabiani ong∙enga.
Associationni dilgiparangni aganani gitade ia sit-in dharnako re∙anggipa bang∙gija bilsirangna skangan ong∙atna tik ka∙ahachim indiba dingtang dingtang a∙selrangchi ong∙atna man∙jaha. Ia chango dharna-ko ong∙atona man∙ahaoba sorkarioni namgipa aganchakani dongjaode mikkangchi dal∙bata ja∙kuko de∙na miksonganiko President kobor ra∙timgiparangna aganaha.
