SHILLONG: Shillong songjinmani Ganesh Das Government MCH Hospital-o Paediatric Intensive Care Unit (PICU)-ko mijal Mongolbar salo, a·dokni Health Minister James PK Sangma kulie on·angaha.
Ia PICU-ko kulie on·angani somoio, a·dokni Health Minister, jinmana aganprakangengon, ia hospital-o sannako man·enggiparangoni sak 30-na baten paediatric case-rangsa ong·a ine parakangaha.
Health Minister-ni aganani gitade, paediatric case-rangko sanna gita ia hospital-o PICU-ko nangchongmotengachim.
Meghalaya a·dokni bilsi 50 gapaniko maniani bak gita ia PICU-ko a·dokni manderangna pakwate on·angna gita ua namen kusi ong·a ineba Sangma parakataha.
Ia hospital-ni PICU-ko kulie on·anganio Health Services (MI)-ni Director Dr Aman Warr-ba dongpae jinmana aganprakengon, ia hospital-o PICU dongkujani gimin iako kulianiara ia hospital-na namen gisik ra·beani sal ong·aha ine parakangaha.
Ia hospital-o PICU-ko kulianichi bi·sarangni saanirangko aro bi·sarangko sannanio bang·a namgni ong·gnok ineba Dr Warr aganaha.
Ia PICU-ko kulie on·anganio, Health department-ni Principal Secretary Sampath Kumar-ba jinmana aganprakangengon, sorkarichi chalaienggipa hospital-rango ian skanggipa PICU ong·aha aro a·dokni gipin biaprango donggipa sorkari health centre-rangoba ia apsan dakgipa unit-rangko kulina sienga ine parakangaha.
Iana skang, Ganesh Das Government MCH Hospital-ni senior paediatric specialist, Dr T. Pde-ba jinmana aganprakengon, ia sal somoirango gital dake COVID-19 giprorotaiengon bi·sarangba saanirangko man·na kenchakanirang dongengani gimin ia hospital-o PICU-ko nangchongmotengachim ine parakangaha.
Ia hospital-o PICU-ko 2021 bilsini June ja dipet rikna a·bachengahachim ineba Dr Pde parakataha.