SHILLONG: Shillong songjinmani mongsonggipa biaprang, jekai Police Bazar gita dakgipa biaprango bomarangko gopretna man·aniara ramram katta ong·jaha ine Gambegre-ni MLA aro Nationalist Congress Party (NCP)-ni state president Saleng A Sangma parakatenba, a·doko songdongenggipa manderangni namgnina iandake so·sojengjeng ong·atani kamrangko nambate nirokchina a·dok sorkariko didiangaha.
Re·anggipa Robibar attamo, HNLC bobil dolni Police Bazar-o IED bomako gopretna man·ahani gimin Saleng, ia kattarangko aganaha.
“Bobil dolrangni iandake so·sojengjeng ong·atanirangko an·ching ramram dake ra·ani ong·jaengaha. Police Bazar gita dakgipa biaprangon uamang bomarangko gopretna man·enga ong·ode uamang jenaba jekoba dakna man·aigen,” ine ia biapo boma gopretanina jegale Sangma aganaha.
HNLC bobil dolko tom·tomanina agangrikna gita okamchinaba ua a·dok sorkariko didiangaha.
“Uamang (HNLC) agangrikna kusi ong·enga ong·ode a·dokni namgnina uamangko agangrikna okamon nambatgipa chol ong·gen. Iandake songjinmani bijangchio bomarangko gopretaniara namen kenchakna nangani ong·enga,” ine Gambegre MLA aganaha.
Bobil dake chakatgipa dolrangko warachakna gita dingtangmancha a·doko bikotgipa Special Force (SF-10)-ni sipairangko home guard aro security guard-rang gita jakkalskaenga ineba Sangma, an·tangni suk ong·gijaniko parakataha.
“A·doko bobil dolrangko bon·atna gitasa SF-10 sipai dolko bikotahachim indiba uamangko nokrango aro mongsongbate secretariat-ni cholgugao dongtimako nikon anga an·tangde namen aiao inmanaha,” ine Sangma aganaha.
Khasi Hills jolrango bobil dake chakatgipa dolni manderang bomarangko gopretrongengani gimin a·doko SF-10 dolni sipairangko jakkalna nangkuenga ineba ua aganaha.