SHILLONG: Assam aro Meghalaya a·dokni simarango meligrikna man·jaenggipa damdok biaprangni bidingo a·dok damgnini sorkarirang, songgigrikaniona sokahani gimin da·ode a·dok damgnini gisepo tom·e chanchirimna nangjawaha indiba ma·mong sorkari baksasa tom·e agangrikangskagnok ine Mongolbar salo, Meghalaya a·dokni Chief Minister Conrad K Sangma parakataha.
Iani bidingo kobor ra·timgiparangna talataniko on·angengon, Assam sorkari baksade iani bidingo Meghalaya sorkari tom·anirangko ong·atna nangjawaha ine Sangma parakataha.
“Da·o chingni agan-chanchirimna nanganide ma·mong sorkari baksasa ong·engaha aro ia damdok biaprangni bidingo apsan asonge chanchirimna gita chinga ma·mong sorkarini okamatanina sengengkua,” ine Chief Minister aganaha.
A·dok damgnini simarango meligrikna man·jaenggipa biaprangoni damdok jolrangko namatchengna ja·ku de·anio, a·dok damgnini sorkarirangan, re·anggipa bilsionin baditaba chang tom·anirangko ong·ate apsan agangrikangahachim ine nikna man·a.
Chief Minister-ni parakatani gitade, regional committee-rangni report-ko niani ja·man mitam biaprangode taridapna nanganirang dongkuenga ine nikenba, a·dok damgnini sorkarirang, re·anggipa January 29 tarikoba apsan asonge chanchirimangtaiaha aro a·dok damgnian songgigrikna tik ka·angaha.
Meghalaya aro Assam a·dokni gisepo meligrikna man·jaenggipa dam 12 songrangoni damdok biaprangko skanggipa bako namatchengna a·dok damgnini chief minister-rang tik ka·manahachim aro ia biaprangara, Meghalaya a·dokni West Khasi Hills, Ri Bhoi aro East Jaintia Hills a·jani ning·o donggipa Tarabari, Gizang, Hahim, Boklapara, Khanapara-Pilangkata, Ratacherra aro Assam a·dokchipakni Cachar, Kamrup Metro aro Kamrup a·jarang ong·engachim.