SHILLONG: Officer-rangna aro office-o kam ka·enggipa manderangna sanna bananirangko on·na man·na gita mijal Mongolbar salo, Additional Secretariat Building-ni Myntdu Building-o Secretariat Health Clinic-ko a·dokni Secretariat Administration Department (SAD) Minister Renikton Lyngdoh Tongkhar-ni jakchi kulie on·angaha.
Secretariat-ni Health Clinic-ko kulie on·angani somoio a·dokni SAD Minister, tom·anio dongpagiparangna aganprakengon, office-rango kam ka·gipa manderangko man·chape mande sakantinan an·seng baljokanikora nangchongmotani gimin Secretariat-o health clinic-ko kulianiara a·doko songdongenggipa manderangna aro Meghalaya Secretariat-na gisik ra·ani sal ong·aha ine parakangaha.
Secretariat-o health clinic-ko kulianichi office-o kam ka·enggiparangna sagitik ding·gitikan somoirango dakchakani ong·gnok ineba ua aganaha.
Ia Secretariat Health Clinic-ko kuliani somoio SAD-ni Commissioner & Secretary MN Nampui aro SAD-ni Secretary VR Syiem-ba dongpae bak ra·angaha.