SHILLONG: Re·anggipa Robibar attamo Shillong songjinmani Police Bazar jolo IED bomako gopretanio chadambe saksaba jak dongpaahani gimin iandake chadambe bi·sarangni bobil dolrango jak on·paaniara namen jajrengna nangani ong·enga ine Budbar salo, a·dokni Social Welfare Minister Kyrmen Shylla parakataha.
IED bomako gopretanio jak donganina police-rang, chadambe saksako man·chape gimik sakbri manderangko rim·aha ine kobor on·ahachim.
Indake ong·engon, bilsi sokkugijagipa chadamberangni iandake bobil dolrango napanganiara sorkarinasan ong·agija songsalnaba namen jajrengna nangani ong·enga ine Social Welfare Minister parakataha.
“Bilsi sokkugijagipa chadamberangni iandake ong·gija kamrango jak on·paani aro mongsongbate bobil dolrango bak ong·paaniara namen dukni katta ong·a maina ian manderangni janggi tanganio ong·sianikosa ra·baani gita ong·enga,” ine Shylla aganaha.
Chadambe bi·sarangko bobil dolrango rimnape, iandakgipa dolni manderang chadamberangni janggirangko nisie galenga ineba Shylla parakataha.
“Uamang chadamberangko bobil dolrango napchina didie uamangni janggi tanganiko aro pilakkon nisie galenga,” ine ua aganaha.
Iandakgipa bobil dolrango jak on·paaniara uamangni janggikon nosto ka·ani gita ong·enga ineba ua chadamberangko mikrake dongchina gita didiataha.