SHILLONG: Re·anggipa Robibar attamo, Shillong songjinmani Police Bazar (Khyndai Lad)-o IED bomako gopretanio jak donggipa sakbri manderangko police-rang rim·na man·aha ine kobor on·aha.
Iani bidingo kobor ra·timgiparangna u·iatengon, IED bomako gopretanio jak donggipa pilak manderangkon police-rang rim·na man·aha aro ning·tubate am·sandianirangko dakengkua ine Budbar salo, a·dokni Chief Minister Conrad Sangma parakataha.
“Shillong songjinmani mongsonggipa biapo IED bomako gopretanio jak donggipa pilak manderangkon rim·na man·aha aro ia a·selni bidingo police-rang, am·sandianirangko dakengkua. Ia manderang baksa jak donggiparangko aro uamangna dakchakgipa gipin manderangkoba chinga sandienga. Da·o dipet IED bomako gopretanio jak donggipa manderangkode rim·na man·aha,” ine Sangma aganaha.
Chief Minister-ni parakatani gitade, rim·ako man·gipa sakbri manderangara, HNLC bobil dolna dakchake on·gipa aro kamko ka·e on·enggipa manderang ong·achim.
“Chinga ia manderangni kosako niamo pangchake rakgipa ja·kurangko de·anggen. A·doko tom·tomaniko nisie galna jotton ka·gipa aro so·sojengjeng ong·atenggipa manderangko sorkari nie dongjawa,” ine Chief Minister aganaha.
Police Bazar-o IED bomako gopretanio jak donganina HNLC-ni Shillong area commander-ko rim·aha ine re·anggipa Sombar salosa police-rang parakatahachim.