Mikrake dongchina gita Sorkari, police force-ko agana

SHILLONG: Re·anggipa Robibaro Shillong song-jinmao IED gopretatani ja·mano maiba maijaba a·sel ong·taijana gita mikrake dongchina A·dok sorkari, A·dok police force-ko aganaha.
“A·doko tom·toma-nirang bingbrangjana gita aro maiba a·sel apot ong·na nangode ingipao je somoioba mikrak simsakde dongchina gita chinga pilak police personnel-ko aganman·aha aro ku·pattianiko on·manaha,” ine Deputy Chief Minister Prestone Tynsong Bristi-baro aganaha.
Noktangona sokbapil-genma sokbapiljawama ingipa kenani gisikrang baksa manderang noktang-oni ong·katna kenja aro jakgitele re·na dona man·na gita sorkari iako dakaha ineba ua aganaha.
“Manderangni namgni-na chinga dakenga aro anga ka·donga sorkari iako dakna man·gen, a·doko police force-ni kam ka·a-nirangna anga namen kusi ong·chaka,” Tynsong agandapaha.
A·doko bilakbaenggipa bobil dolrangko bamatna bilsokjani gimin Opposition AITC-ni sorkarini kosako matnanganirangna aganchakengon, “Jeko aganna skangba AITC-ni ku·wattimgipa namedake nichengna nanga, chingni kam ka·anirang ja·man chakengama chakjaenga, home department-ni kam ka·anirangko niatgen-chimode uamang uamangni nambatako dakenga aro gopretatatanio jak donggiparangkoba bakan rim·na man·aha, uni gimin sorkari ja·manchak-enga inede aganna man·-jawa,” Deputy CM aganaha.
“Bebegita police force-o intelligence wing bilgriode dosi dakgipa-rangko rim·na man·genchim ine anga chanchija. intelligence wing bilaka aro uko bilak-batatanggen aro a·dokni manderangna chu·gimik naljokaniko on·gen,” ua agandapaha.
HNLC bobil dol damberangko rimangenga ingipa bidingo aganengon, ‘‘a·songtangna janggi on·chaka ingipa miksonga-niko ma·sisrettokjachina gita chinga chadambe-rangko mol·mola. Mande-tangna aro a·songtangna ka·sae dakani gadangko ma·sina dingtangdingtang orto ba miksonganirang donga,” Tynsong aganaha.
“Miksonganide na·a nang·ni ga·chakramko mangrakatchengbo- maikae nokdangko rika, maikae songsalko aro a·songko rika uko chadamberang ma·sichengna nanga,” ua agandapaha.
Minggipinara, ma·a paa ong·e dedrangko nama ramao janggi tangdilani aro uamangko skie tarianide ma·a paani daitoan ong·a, jedakode derang ma·brang-na nangjawa, ua aganaha.
“Chadamberangko taning sakselaha- unigimin ge·sa sorkari ong·e pilakchikon niwilwale kamrangko ka·enga. Niam, an·tangni gita kamrangko ka·gen, mamang songsal iarangchi nosto ong·atako man·na nangja,” Tynsong agandapaha.