AITC-ko dakgrikna BJP, NPP apsan ong·e kam ka·naba donga

SHILLONG: All India Trinamool Congress, Meghalaya-o gital party ong·genchimoba mikkang bilsi election-o bilo donge kam ka·gipa NPP-na bilakgipa susagipa ong·naba gnang, uni gimin BJP, gital party-ko ga·akatna NPP baksa apsan ong·e meligrika kam ka·naba donga.
BJP Meghalaya in-charge M Chuba Ao, Sonibar salo kobor ra·timgiparang baksa agangrikmitingo indine aganaha, “NPP aro BJP-ara ma·mongo aro Meghalaya a·dokoba melie kam ka·giparang ong·a, indake dolgni party-an Meghalaya-o AITC-ko dakgrikna apsan ong·e chanchina nanggen. Meghalaya-o AITC, BJP-ni mongsonggipa susagipa ong·a ine ra·chakenba, ‘BJP aro NPP, dolgni apsan ong·e bilakbate kam ka·na nanggen’ ine aganataha.
“Da·ode iani bidingo tale mamingkon agana man·kujawa, dolgni asonge chanchirimna ba agangolpogrikna nanggen maina uamang maiko chanchia, iani gimin chinga u·ija, ine Ao aganaha.
Mikkangchi Ao, NPP dilgiparang baksa agangrikna gronggen ine parakataha.
Indake ong·engon Meghalaya-o Congress-ni bil komiangaha, unbaksana uamango pangkamgipa president-ba dongja, uni gimin TMC, Meghalaya-o bilko man·a raken jotton ka·enga. Haida Mamata Banerjee-ni dilenggipa TMC, election-o adita seat-ko man·aba donga indiba a·dokni bang·bata manderangan TMC-ko ra·chaktokjawa, ineba Ao agandapaha.
Re·anggipa bilsio TMC, Meghalaya a·dokona gital party ong·e napaha. Congress-ni sak 12 MLA-rang party-ko wate TMC-ona napangskaha.