TURA: Garo Hills Autonomous District Council (GHADC)-ni gital chief executive membor (CEM)-ko ra·galpilchina dabitokengon, Garo Hills-ni NGO-rang, re·baenggipa February 8 tarikoni 11 tarikona night road blockade ba walni somoio ramarangko champengatskana tik ka·angaha ine u·iataha.
NGO-rangni u·iatani gitade, ia walbrina rama champengataniko wal 9:00 bajioni pring 5:00 walantian ong·atanggen aro ia jingjengataniko February-ni 12 tarik Sonibar pring 5:00 bajiona ong·atanggen.
Iana skangba, Garo Hills-ni dingtang dingtang NGO-rang, GHADC-ni gital CEM-ko ra·galpilchina dabie, GHADC-o kam ka·aniko salgnina dontongate aro uni ja·man February-ni 3 aro 4 tarikrango salgnina Non-Cooperation Movement (NCM)-ko ong·ate, Garo Hills gimikon jingjengatangahachim ine nikna man·a.
“Chinga iachi Meghalaya a·doko songdongenggipa manderangna u·iatna ska, chong·motan chinga Rakesh (Newar) Sangma-ko GHADC-ni CEM songaniko a·bachengonin jegalaha aro da·oba jegalengkua. Uko CEM-ni biaponiko ra·galchina dabie chinga February-ni 1 aro 2 tarikrango civil disobedience movement-ko a·bachengate GHADC-o kam ka·aniko salgnina dontongataha aro uni ja·man February-ni 3 aro 4 tarikrangoba salgnina Garo Hills gimikon non-cooperation movement (NCM)-ko ong·ate jingjengataha. Chingni ia jingjengatanirang namen chu·sokgipa ong·aha aro da·o chinga gittamgipa changna jingjengatanio February 8 tarikoni a·bachenge 11 tarik walona kingking night road blockade-ko dakangskana tik ka·aha. GHADC-ni gital CEM Rakesh Sangma-ko ra·galkujaskal chinga jingjengatanirangko dontongkujawa aro mikkangchiba apsan daken jingjengatanirangko dakangkugen,” ine Robibar salo, FKJGP Garo Hills Zone-ni president Pritam Marak, kobor ra·timgiparangna parakataha.
GHADC-ni gital CEM-ko jegale GSU, FKJGP, AYWO, ADE aro NESO dolrang baksana dingtang dingtang dolrangba jingjengatanio bakko ra·engachim ine nikna man·a.