SHILLONG: Sonibar saloni Robibar salona konta 24-ni gisepo Meghalaya a·dok gimiko sak 157 manderang COVID-19 man·daptaiaha aro ia apsan salon a·doko mande sakbri COVID man·e siangdaptaiaha.
Konta 24-ni gisepo COVID-19 man·dapgipa sak 157 manderangko channe da·o Meghalaya a·dok gimiko COVID-19 man·e dongenggiparang gimik sak 1462 gapengaha aro ia apsan salon mande sak 4 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1546 gapskaengaha.
Konta 24-ni gisepo COVID man·gipa sak 157 manderangoni, sak 1-de East Garo Hills-o, sak 2-de East Jaintia Hills-o, sak 69-de East Khasi Hills-o, sak 1-de Eastern West Khasi Hills-o, sak 2-de North Garo Hills-o, sak 13-de Ri Bhoi a·jao, sak 2-de South Garo Hills-o, sak 10-de South West Garo Hills-o, sak 5-de South West Khasi Hills-o, sak 41-de West Garo Hills-o, sak 7-de West Jaintia Hills-o aro sak 4-de West Khasi Hills a·jao ong·a.
Salsani gisepo COVID man·e sianggipa mande sakbrioni saksade East Khasi Hills-o, saksade Ri Bhoi a·jao, saksade South West Khasi Hills-o aro saksade West Khasi Hills a·jao ong·a.
Ia apsan salon gimik sak 336 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 89,293 gapskaengaha.