TURA: South Garo Hills a·jani Rongara jolo donggipa Gulpani Nokat songni bilsi 18 ong·gipa chadambe saksa gimaenga ine kobor on·aha.
Koborko on·ani gitade, gimaenggipa chadambeara, Monden N Marak aro Marbina T Sangma-ni depante Lakwan T Sangma ong·achim aro ua re·anggipa Sombar attamo dikdiksa rona ong·katangaonin nokona sokbapilkujaengachim.
Ia chadambe, class 9-o poraienggipa chatro ong·achim aro ua re·anggipa Sombar attamni 6:30 bajimango dikdiksa rona ine nokoni ong·katangahachim ine kobor on·timgiparang u·iataha.
Indake ong·engon, ia gimaenggipa chadambeni bidingo saoba maiba koborrangko man·a donggenchimode ba banoba nikgenchimode 9362013597 ba 6900715704 nomborrangona ka·e u·iatskachina kobor on·timgiparang didiataha.
