SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·otani bidingo am·sandina gita Justice T Vaiphei-ni dilanichi songako man·gipa Inquiry Commission, Sonibar salo, Mawlai Kynton Massar-o donggipa Thangkhiew-ni nokona re·ange, am·sandianirangko dakangaha.
Justice Vaiphei-ni aganani gitade, iana skang Sukrobar saloba ia commission, East Jaintia Hills a·jani Superintendent of Police (SP) Jagpal Singh Dhanoa-ko sing·sandiangskaaha. August-ni 13 tariko HNLC-ni gitcham general secretary-ko police-rangni goe galani somoio police-rangko East Jaintia Hills a·jani SP-an dilangahachim.
Una agre, gipin police sakgnikoba Sonibar salo, inquiry commission, sing·sandiani ong·achim indiba commission-ni office-o bijoli dongjae aro commission-ni office-o generator-rang dongjae sing·sandina man·jaha ine Justice Vaiphei parakataha.
Ia police sakgniko, re·baenggipa February 24 aro 25 tarikrango sing·sandiangskagen.
Justice Vaiphei-ni u·iatani gitade, ia antini gisepo New Delhi-oni ukilrang, Shillong-ona re·bana man·jaengani gimin hearing-ko ong·atna man·jawa.
Police sakgniko sing·sandiani ja·mano ia commission, Thangkhiew-ni nokdangoni sakkirangko sing·sandiangskagen ine Justice Vaiphei parakataha.
Ia a·selni bidingo inquiry dakaniko re·anggipa bilsini September 9 tarik dipet a·bachengatahachim aro iako ta·raken matchotatna jotton ka·gen ineba Justice Vaiphei parakataha.
Re·anggipa 2021 bilsini August 13 tariko HNLC-ni gitcham dilgipako police-rangni so·ote galani ja·man Shillong songjinmao ding·chaoanirang ong·katahani gimin ia a·selni bidingo judicial inquiry-ko dakchina Meghalaya sorkari ge·etangahachim.
