KHADC-ni gital chairman-ko seoka

 

SHILLONG: Sombar salo, Mawphlang-Diengiei-ni MDC Lamphrang Blah-ko maming jegalani gri, Khasi Hills Autonomous District Council (KHADC)-ni gital chairman-na seokaha.

Sombar salo, KHADC-ni salsana ong·atanggipa special session-o Lamphrang Blah-ko gital chairman-na seokaniko KHADC-ni Deputy Chairman Alvin K Sawkmie parakataha.

KHADC-ni gital chairman-ko, KHADC-ni chief executive membor Titosstarwell Chyne, Opposition dolni dilgipa Pynshngain N Syiem aro gitcham chairman Pyniaid Sing Syiem, uni biapona dilangaha.

KHADC-ni chairman-na election-ko ong·atanio Opposition Congress dolde susajana gita manchiaha aro uandaken Blah-ko maming jegalani grian gital chairman-na seokaha.

Iana skang, Sohryngkham-ni NPP MDC Pyniaid Sing Syiem, Blah-na biapko wate on·na gita chairman-ni kamko watskaahachim.

KHADC-ni gital chairman aro Mawphlang-Diengiei-ni NPP MDC Lamphrang Blah, 2004 bilsionin MDC-na seokako man·ahaoba da·osa skanggipa changna chairman-ni kamko jako ra·chengengachim.

Iana skang ua KHADC-ni Executive membor aro opposition dolni dilgipaba ong·skaahachim.

Get real time updates directly on your device, subscribe now.

Comments are closed.