TURA: Assam a·dokoba Garo medium-ko class 12-ona ra·doatna gita Assam sorkari ku·rachakaha ine Garo Students Union (GSU) Assam State Zone aro Garo Sahitya Sabha (GSS) dolrang parakatenba, iani bidingo Assam a·dokni Chief Minister Himanta Biswa Sarma aro Assam-ni Education Minister Ranoj Pegu-ko mittelpilangaha.
GSU Assam zone aro GSS dolrangni parakatani gitade, iani bidingo Indigenous Tribal Sahitya Sabhas of Assam (ITTSA) aro Assam-ni Education Minister Ranoj Pegu, Sombar salo Guwahati songjinmao tom·e chanchirimangenba, Garo medium-ko class 12-ona ra·doatna tik ka·angaha. Ia tom·anio Garo Sahitya Sabha-ni president Soroj Jambil Sangma, GSS-ni secretary John Carry D Sangma aro GSS-ni joint secretary Senjister R Sangma-ba dongpae bak ra·angaha.
“Da·o dipet Assam a·doko Garo medium-ko class 8-onasan ra·engkuani gimin chinga GSS aro GSU Assam state zone, ru·uta somoirangonin Garo medium-ko ra·doatchina Assam sorkario dabiengachim indiba da·alo chingni dabiani be·en pil·na man·engahani gimin chinga Assam-ni Chief Minister Himanta Biswa Sarma aro Education Minister Ranoj Pegu-ko mittelpilna ska,” ine GSU Assam state zone aro GSS-ni dilgiparang parakataha.