SHILLONG: Constitution-ni Sixth Schedule-ko taridapna miksongenggipani bidingo agangrikna gita Sombar salo, Khasi Hills Autonomous District Council (KHADC)-ni Chief Executive Membor Titos Chyne, gipin membor-rang baksa, Meghalaya a·dokni Chief Minister Conrad Sangma-ko grongeaha.
Chief Minister-ko gronge agangrikani ja·man kobor ra·timgiparangna talataniko on·angengon, Sixth Schedule-o ‘Dorbar Shnong’ katta baksana ‘Village Council’ kattakoba on·dapgen ine Chief Minister, uamangna talataniko on·atana ine KHADC-ni CEM parakataha.
Parliament-o Sixth Schedule-ko taridape ra·chakani ja·man, a·dokni dilgiparangba Union Home Minister-ko gronge iani bidingo agangrikenaba gnang.
“Sixth Schedule-ko taridapna bi·aniko Cabinet ra·chakaha ine songbadrango seaniko nikahani giminsa chinga, ‘Village Council’ kattako recommend ka·ani bidingo sorkari maiko chanchienga, talbate ma·sie ra·na nangnikaha,” ine Chyne aganaha.
KHADC CEM-ni parakatani gitade, Sixth Schedule-ko taridapanio ‘Village Council’ katta donggenchimoba Khasi aro Jaintia Hills a·jarangode ‘Village Dorbar’ kattako jakkalskana man·aigen ine Chief Minister, uamangna talataniko on·angaha.