SHILLONG: Re·anggipa bilsio Shillong songjinmani dingtang dingtang biaprango bomarangko gopretanioba jak donga ine adita salrangna skang, Shillong songjinmani Police Bazar-o IED bomako gopretanio jak donganina rim·ako man·gipa bilsini 17-ni chadambe ku·rachakaha ine official-rang parakataha.
Official-rangni parakatani gitade, re·anggipa bilsio Shillong songjinmao donggipa NPP offce sambao IED bomako donanganio aro apsan bilsini August jao Laitumkhrah-o IED bomako gopretanioba ia chadambe jak donga ine ku·rachakaha. Ia chadambeara mingnamgipa college-ni class 12-o poraienggipa chatro ong·achim ine official-rang aganaha.
Ia bilsi 17 ong·gipa chadambeko, re·anggipa January-ni 30 tariko Police Bazar-o boma gopretanina police-rang rim·ahachim aro uni ja·man uni nokoniko IED baksana gipin bomarangkoba man·aha ine a·dokni Home Minister Lahkmen Rymbui parakatahachim.
Sorkari official-rangni u·iatani gitade, uko jakkalgipa manderangko ua social media gita grongchengaha aro social media gitan uamangko uko dilsrete ong·gija kamrangko ka·atna man·ahachim. Boma gopretanio jak donganina ia chadambe baksana bilsi 17-mang ong·gipa gipin pante bi·sa sakgnikoba rim·e juvenile home-o donataha ine official-rang parakataha.
Champengatako man·gipa HNLC bobil dol, Bangladesh-onisa kamko ka·engani gimin chadamberangko didina gita social media-kosa jakkalbatenga aro iako investigating agency-rang name nirikkienga ineba official aganaha.
Indake ong·engon, a·doko so·sojengjeng ong·atenggipa kamrangko name am·sandina gita National Investiagation Agency-ni official-rang a·dokona sokbaaha ineba Home department-ni official-rang parakataha.
