SHILLONG: Meghalaya a·doko Congress dolni bangki dongkuenggipa sakbonga MLA-rangba, National People’s Party (NPP)-chi dilenggipa Meghalaya Democratic Alliance (MDA) sorkari baksa bakrimangaha.
Mongolbar salo, Congress Legislature Party (CLP)-ni dilgipa Ampareen Lyngdoh-ni dilanichi Congress dolni sakbonga MLA-rang, a·dokni Chief Minister Conrad K Sangma-ko grongeaha aro uamangni MDA-o bakrimna manchianiko parakeaha.
MDA-o bakrimanggipa Congress dolni sakbonga MLA-ranga, East Shillong-ni MLA Ampareen Lyngdoh, Mawlai constituency-ni MLA PT Sawkmie, Nongpoh constituency-ni MLA Mayralborn Syiem, Rambrai-Jyrngam-ni MLA Kimfa S Marbaniang aro West Shillong constituency-ni MLA Mohendro Rapsang ong·a.
Congress MLA-rangni MDA-o bakrimna nangnikengani gimin a·dokni Chief Minister Conrad Sangma-na sedoatengon, a·dokna namroro silroroaniko ra·bana kam ka·anio chinga nang·na aro MDA-na chakpaaniko on·na tik ka·aha ine Congress dolni sakbonga MLA-rang parakataha.
NPP-chi dilenggipa MDA sorkario da·o dipet UDP, BJP, HSPDP, NCP, PDF aro Independent MLA-rangba bakrimengachim ine nikna man·a.
Meghalaya a·doko da·o Congress dolba MDA-o bakrimna tik ka·ahani gimin ian a·songo skanggipa changna Congress aro BJP dolrangni apsan bakrimaniko nikna man·skaani ong·engachim.
Re·anggipa bilsio a·dokni gitcham chief minister Mukul Sangma-ko man·chape gimik sak 12 Congress MLA-rang, ong·katgrime All India Trinamool Congress (AITC)-o napangani ja·man Meghalaya a·doko Congress dol bilgriatako man·na nangahachim.
