TURA: Meghalaya a·dokko man·chengani somoion a·dokna krengdilanggipa pagitcham ma·gitchamrang, Tura-ko Winter Capital dake, Shillong-ko Summer Capital dakna manchiahachim indiba da·alonan pagitcham ma·gitchamrangni nangnikaniko sorkari chu·sokatkujaenga ine A·chik Holistic Awakening Movement (AHAM) suk ong·gijaniko parakatenba, iani bidingo gital dake dabina Garo Hills-ni dingtang dingtang biaprango signature campaign-ko dingtang dingtang somoirango ong·atenga ine parakataha.
“Meghalaya a·dokko Assam a·dokoniko bake man·ani somoion Tura-o Winter Capital dake, Shillong-ko Summer Capital dakna gitasa dingtang a·dokna krengdilanggipa pagitchamrang nangnikahachim indiba da·o a·dokko man·aoni bilsi 50 gapani ja·manoba ia jumangko a·dok sorkarirang chu·sokatchipkujaenga aro Garo Hills-ni dilgiparang an·tangtangan Garo Hills-ni manderangko togie donenga,” ine AHAM-ni president Georgeprince Ch Momin parakataha.
Garo Hills-o winter session-ko ong·atan baksana sorkarini pilak mongsonggipa office-rang, jekai Governor’s House, Additional Secretariat, Winter Assembly, MLA-rangni quarter-rang, joint directorate-rang aro uandakgipa biaprangko man·kujaskal AHAM dolni gita jingjengatanirangko dakangkugen ineba AHAM-ni president parakataha.
Maming jat aro torom baseani gri Garo Hills-ni manderangko iani bidingo apsan ku·cholsan ong·e ja·ku de·china didiatengon, “Skanggipa bako chinga Garo Hills-o songdongenggipa manderangna, an·tangtangni man·gnini gimin mikrakataniko aro ma·siate on·na signature campaign-ko ong·atenga aro ia signature campaign-ko dingtang dingtang tarikrango Garo Hills-ni pilak biaprangon ong·atanggen,” ine Momin parakataha.
Garo Hills-o songdongenggipa manderangni dabianiko knachake, Tura-o winter session-ko ong·atan baksana sorkarini pilak mongsonggipa office aro nokrangko donchina gitaba AHAM, NPP-chi dilenggipa MDA sorkariko didiataha.
