SHILLONG: Indita bilsirangna a·songni kosako chakate so·sojengjeng ong·atani kamrangko ka·ani ja·man da·o bon·kame sorkarini champengatako man·gimin Hynniewtrep National Liberation Council (HNLC) bobil dolba tom·tomaona re·bapilna gita sorkarini dongimin niam gitan agangrikna kusi ong·enganiko parakataha.
Indian Constitution-ni ning·on uamang sorkari baksa agangrikna tariaha ine talataniko on·angengon, sorkari baksa agangrikanio ku·baltitimgipani kamko ka·na gita ta·raken mandeko seoke on·china HNLC bobil dolni general secretary aro publicity secretary Sainkupar Nongtraw dabiangaha.
“Sorkarini nangnikani gitan chinga agangrikaniko dakna maming niamrangko donjana tik ka·aha indiba ta·raken ku·baltitimgipako songe on·china chinga nangnikenga,” ine HNLC-ni dilgipa parakataha.
Nongtraw-ni parakatani gitade, sorkari baksa agangrikanio Standstill Agreement (SA) aro Instrument of Accession (IOA)-kode man·chapskajawa.
Dal·batgiparang aro dingtang dingtang dolrang baksa agangrikanio, bang·batan uamangko mol·molahani giminsa uamang da·o tom·tomaniona re·bapilna gita ia ja·kuko de·aha ineba HNLC-ni general secretary parakataha.
“Adita salrangna skang chingna dal·batgipa manderang baksa agangrikani ja·man chinga Meghalaya sorkari aro India sorkari baksa tom·tomanio songgigrikna manchiaha,” ine Nongtraw parakataha.
HNLC-ni gitcham general secretary Cheristerfield Thangkhiew-ko so·ote galanina an·tangni suk ong·gijaniko parakatengon, Thangkhiew-ko so·otani a·selan uamangni tom·tomaniona re·bana manchianiko nisigalani gita ong·ahachim indiba da·o uamang manderangni namgnina ia ja·kuko de·na nangnikaha ine Nongtraw parakataha.
Mikkangchi tom·tomanina kamrangko ka·anio dingtang dingtang dolrangba uamang baksa bakrimaniko on·gen ineba HNLC-ni secretary, an·tangni ka·dongchakenganiko parakataha.
HNLC bobil dolko tom·tomaona rimbapilna gisiko nanganiko mesokna gita ta·raken ku·baltitimgipako seokchina sorkariko didiangengon, “Ia somoio chingni mongsonggipa miksonganian chingni so·sojengjeng ong·atani kamrangko bon·atanian ong·enga aro sorkari gisik nangbebeenga ong·ode aro kakket ong·bebegenchimode iako chu·sokgipa ong·atna man·gen,” ine HNLC-ni general aro publicity secretary parakataha.
