TURA: Raksamgre constituency-o changgnina MLA ong·anggipa aro Congress dolni dilgipa Limison D Sangma, Sombar salo Congress doloni ong·kataha ine kobor on·aha.
Sombar salo ua Congress-oni ong·katani chittiko Meghalaya Pradesh Congress Committee (MPCC)-ni president aro secretary-na on·ataha.
Congress dolko watanggipa Limison D Sangma, Tikrikilla-ni AITC MLA Jimison D Sangma-ni adagipa ong·a aro kobor on·timgiparangni u·iatani gitade, re·baenggipa 2023 bilsini Assembly election-na All India Trinamool Congress (AITC)-ni tikitko GHADC-ni gitcham chief executive member (CEM) aro da·o Raksamgre-ni MLA ong·enggipa Benedic R Marak-na on·ani cholrang dongengani gimin Limison Sangma an·tangde, National People’s Party (NPP)-o napskaani cholrang dongenga.
Da·o dipet GHADC-ni gitcham CEM Benedic Marak-ba AITC-o napkujaengoba ja·mano ua Meghalaya a·doko Mukul Sangma-chi dilenggipa AITC-o napangnaba gnang ine kobor on·timgiparang parakataha.
“Da·o ua (Benedic), MLA-ni term bon·ako sengengkuani gimin election-na skangde AITC-o napanggen ine niksamsona man·enga. Benedic Marak, AITC-o napangahaode Limison-de NPP ba gipin dolrango nape suskaana agre gipin cholrang dongjaengaha maina a·dok gimikon da·o Congress dol bon·anga gita ong·engaha,” ine kobor on·timgiparang parakataha.
Raksamgre-ni MLA Benedic Marak-ko GHADC-ni CEM ong·aoniko NPP-ni MDC-rangan ra·galatahaoba da·o dipet ua an·tangde NPP-oni ong·katani bidingo mamingkoba paraka dongskakujaengachim.
