TURA: Meghalaya a·doko aro mongsongbate Garo Hills-o skatang a·ningni bosturangko bikotengani a·sel samtangtango ong·telaigiparangna nangchakeaniko ra·baengani gimin iandake skatang a·ningni bosturangko bikotjachina West Garo Hills a·jani Deputy Commissioner Ram Singh didiataha.
A·ningni bosturangko niam gri bikote salruraanirang batroroengani gimin Budbar salo, District Level Task Force (DLTF) baksa uni office chamber-o tom·e chanchirimangani somoio DC, ia kattarangko aganaha.
Rama tariani, nok rikani aro uandakgipa kamrangko ka·enggipa sorkari department-rangkoba, niam gita bosturangko on·enggipa manderangoniko ra·e jakkalchina sorkarini challan gnangsa bosturangko salrurachina gita Deputy Commissioner didiangaha.
District Mineral Fund (DMF)-ni ning·o signboard-rangko songe aro jinma apsan chanchirimanirangko dake West Garo Hills a·ja gimikon awareness program-rangko ong·atgen ineba ua parakataha.
DLTF-o sorkari official ba skigipa ba kamoni neng·takgimin officer-rangoni sakgniko independent member dake songna gitaba ia tom·anio West Garo Hills a·jani Deputy Commissioner aro DLTF-ni Chairman Ram Singh, tik ka·e donangaha.
Iana skang, ia tom·anio Divisional Forest Officer (DFO) aro DLTF-ni Secretary Rupankar K Marak, DLTF-ni dakna nanggni kamrangko talate on·angengon, je manderangan a·ningni bosturangko bikotanio niamrangko pe·enga ba Environmental Clearance certificate-rang dongjachim, uandakgipa manderangni licence-rangko den·galpilchina gita ku·pattianiko on·angaha.
