SHILLONG: Meghalaya a·doko aro mongsongbate Khasi-Jaintia Hills a·jarango bobil dake chakatenggipa Hynniewtrep National Liberation Council (HNLC) dolni maming niam dona gri agangrikna on·aniko Budbar salo a·dok sorkari ra·chakangaha indiba agangrikna on·aniko chittio see u·iatchina didiatskaaha.
Ma·mong aro a·dok sorkari baksa maming niam donagri agangrikna kusi ong·enganiko parakatengon, sorkari baksa agangrikna gita ta·raken ku·baltitimgipako songe on·china HNLC dabiangskaahachim ine nikna man·a.
Indake ong·engon, HNLC bobil dolni sorkari baksa agangrikna parakatani ja·mano a·dokni Chief Minister Conrad Sangma, a·dokni Deputy Chief Minister Prestone Tynsong, a·dokni Home Minister Lahkmen Rymbui aro dingtang dingtang sorkari official-rang baksa tom·e chanchirimangenba, HNLC bobil dolni agangrikna on·engani gimin kusi ong·aniko parakataha.
“HNLC bobil dolni agangrikna chol on·enganiko sorkari ra·chakenga indiba uamangni agangrikna nangnikenganiko uamang seachi sorkarina u·iatna nangskagen,” ine Cabinet tom·a matchotani ja·mano a·dokni Chief Minister Conrad Sangma aganaha.
Ku·baltitimgipa ta·raken songe on·china HNLC bobil dolni dabienggipani bidingo janapatengon, ku·baltitimgipani kamko ka·na gita sorkari adita sak manderangni bimingrangko minge donaha indiba da·o dipet ku·baltitimgipani bimingko sorkari parakna man·kujawa ine Chief Minister parakataha.
Dal·batgiparang aro dingtang dingtang dolrang baksa agangrikanio, bang·batan uamangko mol·molahani giminsa uamang da·o tom·tomaniona re·bapilna gita ia ja·kuko de·aha ine HNLC-ni general secretary aro publicity secretary Sainkupar Nongtraw parakatahachim.
