SHILLONG: Meghalaya a·doko Congress dolni sakbonga MLA-rangni NPP-chi dilenggipa Meghalaya Democratic Alliance (MDA) sorkario bakrimeania joltangni regional political dolrangna namgipa chin ong·enga ine Bristibar salo, Hill State People’s Democratic Party (HSPDP) parakataha.
HSPDP dolba NPP-chi dilenggipa MDA sorkario bak ong·paengachim ine nikna man·a.
Indake ong·engon, Meghalaya a·doko Congress dol chu·gimik bon·atako man·na siengahani gimin ian joltangni political dolrangna namgipa chin ong·skaengaha ine HSPDP-ni president KP Pangniang parakataha.
“Congress dolni sakbonga MLA-rang, MDA sorkario bakrimeahani gimin ian national party-ni chong·mot noksako mesokani ong·aha,” ine Pangniang aganaha.
Congress MLA-rangni MDA-o bakrimeaniko NPP dolde kusi ong·en ra·chakengachim indiba Cabinet-o biapkode on·na man·kujawa ine a·kangskaengachim.
Meghalaya a·dokni sakbonga Congress MLA-rang, AICC aro MPCC baksa agangrikchenggija MDA sorkario bakrimeahachim ine nikna man·a.
