TURA: Assam aro Meghalaya a·dokni gisepo donggipa Riangdo-Hahim ramako tarichipgija donengani a·sel da·o ia ramani obosta namjabatroroangengaha ine Garo Students Union (GSU) Aradonga regional unit parakatenba, ia ramako ta·raken tarichina dabiangaha.
GSU Aradonga unit-ni president Celestine J Sangma-ni u·iatani gitade, ia ramako tarina gita 2020 bilsion North Eastern Road Sector Development Scheme-ni ning·o Development of North Eastern Region (DoNER) Ministry, gong kror 99 tangkarangko chame on·ahachim indiba da·onan ia ramako tarichipkujaengani a·sel ia ramani obosta namjabatroroangengahachim.
“Ia ramani obosta da·o namsrangjahani a·selan Riangdo aro Hahim jolrango songdongenggipa manderang, Shillong ba Tura-ona songrena gitamangmangba Assam rama gitasa re·na nangenga indiba da·ororo Covid-na dongimin niamrang donge chinga Assam rama gita re·ruraanioba neng·nikanirangko chagrongna nangenga,” ine GSU Aradonga regional unit-ni president parakatenba, ia ramako ta·raken tarichina gita kamrangko nirokatchina Meghalaya sorkariko didiataha.
