Tura: Meghalaya Chief Minister, Conrad K Sangma, Sonibar salo Tura Civil Hospital-o boldok Specialized Mobile Vaccination Units-ko a·bachengate on·aha. Tom·anio West Garo Hills-ni Extra Assistant Commissioner, Dolrich B G Momin, Tura Municipal Board-ni Chairman J D Sangma, West Garo Hills Tura District Medical & Health Officer Dr. Marwin R Sangma, District Maternal Child Health Officer Dr. Ivonne M Sangma – uamangba bak ra·angpaaha.
Vaccination centre-ona re·ange tika su·na neng·nikgipa manderangona mobile vaccination units-ko sokate tika su·na man·a gita Meghalaya sorkari, US Agency for International Development (USAID) baksa melie kam ka·aha. Uandake je biaprangona vaccination centre-ko sokatna neng·nika, ua biaprangona mobile vaccination unit, re·angskae GiveIndia, Crypto Relief, USAID, BCG, Vaccine on Wheels baksa melie kam ka·gen. Uamang Meghalaya-ni West Garo Hills aro East Khasi Hills district-o ge 6 mobile Vaccination Clinics-ko a·bachengataha. Ia ja·ku de·aniara manderangna u·ianiko gipata baksana songadamo donggipa manderangko tika su·na kam ka·gen.
Iarangni gisepon mobile unit-o doctor, nurse-rang donggen, uamang songni manderangna tika su·ani gamchatako u·iate on·a baksa nokantiona re·roroe tika su·gen.
Niatgenchimode covid sajinmani a·sel a·gilsakni gimik bakrangon neng·nikako man·tokaha, bang·arangan janggitangko gimattokaha, bang·a nokdangna duk-neng·nikani sokaha. Uni gimin mikkangchi bang·a manderangni janggiko naljokatna tika su·na nangchongmota, tika su·e ra·achi na·a an·tangtangko aro nokdangni manderangko ba ripengska, noksul-songsulko sabisioni naljoke rakkina man·a. Minggipin India, sabisiko warachakanio a·gilsako dal·batgipa vaccination campaign-ko a·bachengataha, ua drive-ko ong·atao, kror 170 baten tika su·aha.
