SHILLONG: A·dok sorkari baksa name kam ka·na aro ning·tue chanchina somoian dongja jeni a·sel cut and pastre strategy-o pangchake kam ka·a ine All India Trinamool Congress (AITC) -ni dilgipa, Mukul Sangma, Sonibar salo sorkariko matnangaha.
“Jensalo na·a tik ong·e kamrangko ka·na miksongaon aro namgipa result-ko man·na jotton ka·engon, rakbate kam ka·na nangao ga·aka, indiba ia sorkariode name ka·na somoian dongja, uni gimin name dake ka·sine chanchia dongjani a·sel maming kamkon tik ong·a dongja, ine AITC State dilgipa Dr Mukul Sangma aganaha.
“Somoi dongjani a·sel sorkari, cut and paste strategy-ko ja·rika, indaken ong·baenga, indiba a·dokni manderangnade kam ka·enga inede agana. Assam-o covid-na champenganiko ra·galani adita sal ja·man Meghalaya-ba covid-na champenganirangko ra·galahani gimin Dr Mukul, aganataha.
Bilsi gital a·bachengaon sorkari, kamrangko gisik nangbee ka·e mesokenba meeting tom·anirangko ong·ataha aro champenganiko ra·gatahachim. Uaba gipin a·dokrangona poraina ba kam ka·na re·anggiparangni Krismasna re·bapilani ja·mansa champenganiko ra·gataha. Re·bagiparangoni saobarangde sabisi man·e ra·baaha, indiba manderang saa man·ani ja·mansa champenganiko ra·gatania maia gamchata donga.
“December jaoni sabisi man·ako bang·en nikna man·aha, somoiko niate nibo ka·dingnasa sikpilaia.” Jensalo sabisi man·giparang bang·rikrikbaa, ua somoiosa champenganiko komiatskaa, iako gimikan nikenga, ine Mukul Sangma aganaha.
A·dok sorkari, nipiltaina tom·ani ja·man, a·doko dongimin covid champenganiko ka·sinsin ra·galangna tik ka·aha. Iarangna agreba Chief Minister-ni sorkario kam ka·giparangna arear on·na tik ka·aniko arear-ko boksis ine janapani giminba matnangataha.
“Boksisara maia? bilsi 2020-oba sorkario kam ka·giparangna arear-ko on·na ku·chakaha, jekon CM, kratcha·gija Krismas boksis ine janapaha, uara maidake boksis ong·gnok, uan kamtangni kri man·gipa tangkasa ong·a, ukomangba on·jaha, ine Sangma aganaha.
Sorkario kam ka·giparang 30 percent arrear-koba man·a nangni dongkuenga, uara bachijok, ine sing·ataha.
