SHILLONG: Garo Hills Autonomous District Council (GHADC)-o CEM Benedict Marak-o ra·galani ja·mano Rakesh Sangmako gital CEM-na songani gimin ding·chaoengon, GHADC-o indakgipa dal·gipa post-ko ra·na gita Rakesh Newar Sangmao A·chik jatni nanggipa gunrang dongja, uni janggi tangbagimin salrangoba ua A·chikni bewalo dal·bagipaba ong·ja, GHADC election-na mangmangsa Tribal-ni man·gniko nikenba ua Newar-oniko Sangma de·aha ine A·chik Association For The Protection Of Environment (AAPE) aganaha.
CEM-ni post-na election ong·aton A·chik MDC-rangara una chakpaaha? A·chik jatni dakbewal rikbewalni gimin mamingkoba ma·sigijagipa mande Rakesh Newar-ko CEM songna chakpaanio, uamangni maiba miksongani dongama? A·chik jatni songsalni gita maiba neng·nikanirang sokon, ua uarangko namatna changgenma? Dingtang dingtang nangrimgimin NGO-rang, Non-Cooperation Movement, Civil Disobedience Movement ugitarangko dakpile jingjengate, Rakesh Newar-ko CEM post-oniko ra·galchina dabiengoba party-ni high command maina chakchike dongenga, ia mamlani bidingo uamang maina mikchipe dongenga? GHADC-o ong·enggipa obostarangni gimin uamangara simsakatengama? AAPE sing·doaha.
Ia mingsa dal·gipa chanchina nangani ong·enga, unigimin pilak A·chik manderangan ong·katgrime iani bidingo chakpaaniko on·na nanga. Rakesh Newar-ko CEM-oniko ra·galjaode GHADC aro A·chik songsalna namen namjawajok. Unigimin chingaba dolsa A·chik Association ong·e, Rakesh Newar-ko GHADC CEM-ni post-oniko ra·galchina dabienggipa NGO-rangna aro A·chik jong-adrangna chakpaaniko on·a aro dabianio chu·sokjana kingking ku·rang on·gen, AAPE janapataha.
Indake ong·engon, dabiani chu·sokjana kingking ku·cholsan pakripe gatrime chakpaaniko on·china gitaba AAPE, pilak A·chik jong-ada no-abirangkoba mol·molaha.
