TURA: South Garo Hills a·jani Gasuapara Land Customs gita Bangladesh a·songona koelarangko salangna gita da·o dipet Assam-oni koela salgipa truck garirang, Meghalaya a·dokona re·napbaa dongkuja ine North Garo Hills a·jani Dainadubi-o donggipa Directorate of Mineral Resources (DMR) office-oni parakataha.
DMR official-rangni parakatani gitade, ia DMR check gate-o koela salgipa truck garirangni re·ruraaniko nirikkina gita CCTV camera-rangkoba donahachim aro da·o dipet Assam-oni koela sale re·baenggipa truck garirangko ia biap gita nikrika dongkujachim.
Adita salrangna skangsan, South Garo Hills a·jani Gasuapara gita niam gri Bangladesh a·songona koela watanio jak donggipa Balwan Soni (Bhama)-ko gipin sakbri manderang baksa, kajina gamchipgija dongengani gimin Assam-ni police-rang, Guwahati songjinmani Basistha joloniko rim·ahachim.
Assam-oniko Gasuapara gita Bangladesh a·songona koela watna gita Bhama-ni ‘Jaymaa’ company-na a·dok sorkari permission-ko on·ahaoba, ia koelarangara Assam-oniko ra·bagipa koelarang ong·jachim indiba Meghalaya a·dokni koela a·damrangoniko bikotgipa koelarangan ong·achim ine ma·sina man·aha.
Assam-oniko Garo Hills gita Bangladesh a·songona koelarangko watna Assam aro Meghalaya a·dok damgnionin bang·bea koela badinggiparang dorgastorangko galahaoba a·dok sorkari, Bhama-ni company-nasan bilko on·aiaha aro uandaken ia mandeni company, niam gri koelarangko bikote Bangladesh a·songona watna a·bachengahachim.
Assam-oni koelarangko Bangladesh a·songona watna gita sorkarini ge·etaniko re·anggipa 2021 bilsini December jaon on·aha aro uandaken, ia company-ni nokgipa Balwan Soni (Bhama)-ko adita salrangna skang rim·aona kingkingan, Garo Hills-ni koelarangko niam gri bikote Bangladesh a·songona watataha.
Kobor on·timgiparangni parakatani gitade, skanggipao koelarangko South Garo Hills a·jao donggipa Jadi jolrangoniko koela badinggiparang breenba, NH-62 rama gita truck garirango watatenga aro ja·mano koelarangko Gasuapara-ni koela a·damrango galenga. Ia koelarangko Gasuapara gita salbana truck-prakon gong 50,000-mangni gita Bhama-ni company-na e-way bill-rangko jakkalskaengachim ine kobor on·timgiparang parakaha.
