TURA: MEGHA-LAMP aro SELCO foundation-ni dakchake on·anichi Tikrikilla jolo donggipa Lower Rengsipara songo bikotgipa Solar Powered Cold Storage-ko re·anggipa Sonibar salo, a·dokni Chief Minister Conrad K Sangma-ni jakchi kulie on·angaha.
Ia Solar Powered ba salni bilchi chalaigipa Cold Storage ba ka·sinate rakkiani kolara Rengsipara Integrated Village Cooperative Society-ni kuligipa kol ong·enga aro ia cold storage-ko kulianio gong lak 15 koros ong·ahachim.
Ia Cold Storage-ko kulie on·angani somoio a·dokni Chief Minister, jinmana aganprakangengon, ian game ge·e cha·enggipa manderangna, an·tangtangni game ge·e man·enggipa bosturangko ru·uta somoirangna ripinge donna dakchakani ong·gen ine parakangaha.
Meghalaya a·dokni dingtang dingtang biaprango game ge·e cha·enggipa manderangni namgnina mikkangchi a·dok sorkari, a·dokni dingtang dingtang biaprangoba apsan dakgipa cold storage unit-rangko kulie on·anggen ineba Chief Minister parakataha.