TURA: District Council-ni kamrango a·dok sorkari aro minister-rangde, district administration gita ba police department-ni gitaba jak on·pana bil dongjachim ine Sombar salo, Tura-ni BJP MDC Bernard N Marak talataniko on·angenba, district council-ni kamrango a·dok sorkarini jak on·paronganiara namen kraani ong·jaenga ine parakataha.
Marak-ni parakatani gitade, 2002 bilsion Sixth Schedule baksana State Government aro Council of Minister-rangni daitoni gimin Gauhati High Court-ni gita raiko on·anichi district council-rango sorkarini jak on·paaniko kachari champengatahachim aro district council-rangko chalaianio Governor-nasa chu·gimik bilko on·ahachim.
“District council-rangko chalaianio minister-rangnade maming bilko on·jahachim aro a·dok sorkari ba minister-rangan district council-ni kamrango jak on·genchimode Tribal-rangni a·jao jakgitelanian dongjawaha,” ine Tura-ni MDC parakataha.
A·dok sorkari, A·chikrangko cha·bokna jotton ka·engachim ine janapatengon, ia sal somoirango manderang pilakan an·tangtangna on·gimin bilrangni gimin ma·sitokaha aro uamang an·tangtangni bilna dakgrikaigen ine Marak parakataha.
Shillong-o katchipe dongaigija gital CEM, NGO-rangko mikkangpara gronge manderangni ma·sigijanirangko agan-talate on·na nanga, ong·jaode kamtangko watsrangna nanga ineba Tura-ni MDC parakataha.