TURA: Garo Hills Autonomous District Council (GHADC)-ni gital chief executive membor (CEM) Rakesh Sangma-ko kam ra·galchina ba ua an·tangan kamtangko watchina Garo Hills gimikni NGO-rang dabitokengoba, da·alona kingkingan uko ra·galkujaengani gimin aro ua an·tangba kamtangko watjaengani gimin Sombar salo, Garo Hills gimikni NGO-rang, Garo Hills gimikoni tom·chimongbagipa ritchani ritcha manderang baksa GHADC office-ona napdraangenba, gital CEM-ni kosako chrik a·bokanirangko dake, uko ta·raken CEM-ni kamoniko ra·galchina dabiangtokaha.
GHADC office-ko chadrapena skang, Garo Hills gimikni manderang, Tura Te·teng A·jao donggipa College Field-o jinma tom·bimongchengaha aro ua biapo adita somoirangna jinma tom·ani ja·man, Hawakhana gita jinma re·jomangenba, GHADC office-o napdraeaha.
Dingtang dingtang dolrangni aro mande jinmani napdrabaaniko champengsona gita GHADC office-ona dakanggipa pilak cholgugarangon chel·chakgipa sipai dolrangko donatahachim indiba manderang ka·a ding·chaoe GHADC office-ona napdraangon, ua biapo champengsoenggipa sipai dolrang mamingkoba dakna man·jaha.
GHADC office-ona jinma napdraangani ja·man, office mikkango jinma tom·bimonge, gital CEM Rakesh Sangma-ni kosako jegalanirangko dakangtokaha aro uko ta·raken kamoniko ra·galpilchina dabiangtokaha.
Ia tom·bimonganio dingtang dingtang dolrang, jekai GSU, ADE, AYWO, FKJGP, FAF aro uandakgipa dingtang dingtang dolni dilgiparang jinmana aganprakangengon, GHADC-ni gital CEM Rakesh Sangma-ra gipin jatni an·chi bringimin mandesa ong·e A·chikrangni ‘raja’ ong·na kraja maina ua A·chikrangni niam bidikni gimin aro A·chikrangni dakbewal rikbewalni bidingo mamingkon ma·sigijagipa mandesa ong·a ine parakangenba, uko ta·raken CEM ong·aoniko ra·galpilna nanga, ong·jaode ua an·tangan ma·sichake kamtangko watna nanga ine dabiangtokaha.
Gital CEM-ko ra·galchina dabianiko bilakbatatna gita da·al Mongolbar saloni re·baenggipa Sukrobar salona GHADC office-ko kam ka·na on·gija jingjengatangna gitaba ia tom·anio NGO-rang tik ka·e donangaha.
