TURA: West Garo Hills a·jani dingtang dingtang chiring chibisikrango bol den·aniko aro a·ba o·aniko champengna gita West Garo Hills a·jani District Magistrate, dingtangmancha Section 144 CrPC-ko ra·gate on·angaha. Section 144 CrPC-ko ra·gatanio, dingtangmancha biap damsano apsan gama ge·aniko aro chiring chibisikrangoniko an·cheng aro ro·ong bikotanikoba champengataha.
Adita salrangna skang, dingtang dingtang songni nokmarang, VEC-rang, mondolini dilgiparang aro dingtang dingtang dolrang baksa Tura-ni DRDA conference hall-o tom·e chi ong·katatgipa bolrangko apsan ge·na manchiangani ja·man West Garo Hills a·jani District Magistrate, ia niamko ra·gatangaha.
Songadam nokadamrango donggipa nokantionan ringani chirangko sokate on·na gita India sorkari, Jal Jeevan Mission-ko ra·gate West Garo Hills a·jaoba ia scheme-ni ning·o nokdang ge·antionan chi pipe-rangko sorkari sokate on·na kam ka·engachim ine nikna man·a. Indake ong·genchimoba chiring chibisikrango donggipa bol wa·arangko den·anichi aro chi salope galgipa bolrangko game ge·e cha·enganichi chiring chibisikrang tipangskaengaha ine nikenba, chiring chibisikrangni tipanganiko champengna ia niamko ra·gataha ine West Garo Hills a·jani District Magistrate parakataha.
Indake ong·engon, chiring chibisikrangoni paktangtangon metre 50-ko a·kange, ia biaprango chi ong·katatgipa bolrangko ge·skachina gitaba District Magistrate, A·king Nokmarangko aro village employment council (VEC)-rangko didiataha.
Ia niamko pe·genchimode, IPC-ni Section 188-o pangchake nanga gita sastirangko man·gen ineba District Magistrate mikrakataniko on·ataha.