SHILLONG: Meghalaya a·doko aro mongsongbate Khasi-Jaintia Hills jolrango bobil dake chakatenggipa Hynniewtrep National Liberation Council (HNLC) dolni sorkari baksa agangrikna nangnikaniko sorkarina u·iatmanahani gimin ia kamko chu·sokgipa ong·atna gita MDA-o bakrimaniko Congress doloniko ra·gala man·gipa sakbonga MLA-rangba sorkari baksa bakrimaniko on·gen ine Budbar salo, East Shillong constituency-ni MLA Ampareen Lyngdoh parakataha.
Meghalaya a·dokni nangchongmotgipa kamrango dakchakanirangko aro bakrimaniko on·na gitasa Congress dolni sakbonga MLA-rang, NPP-chi dilenggipa MDA sorkario bakrimaniko on·aha ine adita salrangna skangsan Congress Legislature Party (CLP)-ni gitcham dilgipa Ampareen Lyngdoh parakatahachim.
BJP dolba MDA sorkario bak ong·skaengani gimin MDA-o bak on·eani ja·man a·dokni sakbonga MLA-rangko, Congress dolo bak ong·paaniko dontongatchina gita AICC, ge·etaniko on·angskaahachim.
Indake ong·engon, HNLC bobil dolko tom·tomaona rimbapilani aro bobil dolko sorkari baksa agangrikaniona rimbaanian Khasi aro Jaintia Hills-o songdongenggipa manderangni nangnikani ong·a ine Lyngdoh talataniko on·angskaenba, HNLC bobil dol baksa agangrikaniko a·bachengatna kamrangko ka·dilengahani gimin a·dokni Chief Minister Conrad K Sangma-ko mittelpilangskaaha.
“A·dokni dingtang dingtang biaprangon bobil dake chakatanirangko an·ching nikna man·aha aro iandake a·songni kosako chakatani a·selan tom·tomanirang dongjaha aro so·sojengjeng ong·anirangan gapaha. Da·o HNLC bobil dolba sorkari baksa agangrikna kusi ong·aniko parakahani gimin sorkari baksa agangrikani chu·sokgipa ong·gen aro iani an·chingna tom·tomani aro namroro silroroaniko ra·bana man·gen ine chinga ka·dongenga,” ine Lyngdoh aganaha.
Indita bilsirangna HNLC bobil dolni sorkari baksa agangrikna nangnikani chu·sokgipa ong·na man·kujaengachim ine an·tangni suk ong·gijaniko parakatengon, ia kamko jako ra·e ka·dilengani gimin ua, a·dokni Chief Minister-ko mittelpilataha.
Ma·mong sorkari baksa maming niam donna gri agangrikna tarianiko HNLC bobil dol, a·dok sorkarina seachi u·iatahani gimin a·dokni Chief Minister Conrad Sangma, Delhi-ona re·ange Budbar salo, Ministry of Home Affairs-ni Home Secretary-ko grongeahachim ine nikna man·a.