SHILLONG: Mongolbar saloni Budbar salona konta 24-ni gisepo Meghalaya a·dok gimiko sak 60 manderang COVID-19 man·daptaiaha indiba ia konta 24-ni gisepo a·doko COVID man·e sigiparang dongskajaha.
Konta 24-ni gisepo COVID-19 man·dapgipa sak 60 manderangko channe da·o Meghalaya a·dok gimiko COVID-19 man·e dongenggiparang sak 550 gapengaha.
Konta 24-ni gisepo COVID man·gipa sak 60 manderangoni, sak 3-de East Garo Hills-o, sak 3-de East Jaintia Hills-o, sak 24-de East Khasi Hills-o, sak 1-de Eastern West Khasi Hills-o, sak 1-de North Garo Hills-o, sak 1-de Ri Bhoi a·jao, sak 3-de South Garo Hills-o, sak 4-de South West Garo Hills-o, sak 1-de South West Khasi Hills-o, sak 11-de West Garo Hills-o, sak 7-de West Jaintia Hills-o aro sak 1-de West Khasi Hills a·jao ong·a.
Ia apsan salon gimik sak 119 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 91,016 gapskaengaha.
Da·o dipet Meghalaya a·doko COVID-19 man·e sianggiparang gimik sak 1565 gapskaengachim.
