SHILLONG: Budbar salo Meghalaya a·dokni police-rang, Ri Bhoi a·jani Byrnihat jolo, gopretna jakkalgipa bosturangko gari bolsaoniko rim·rikna man·aha.
Police-rangni dakrongbewal gita nirok sandianirangko dakengmiting somoio ia gopretna jakkalgipa bosturangko gari bolsaoniko man·aha.
Police-rangni u·iatani gitade, ia gariko neng·takchina gita police-rang aganon, gariko saltimgipa sale katna jotton ka·aha indiba ja·mano police-rang, ia gariko rike rim·na man·aha.
Iani bidingo police-rang, mande sakgniko rim·aha ineba u·iataha.
Re·anggipa bilsionin police-rang, Meghalaya a·dokni dingtang dingtang biaprango, iandake gopretna jakkalgipa bosturangko rim·na man·engahachim.
Meghalaya a·doko niam gri koela badingenggipa manderangni dakchakanichi badiaba dolrang, bobil dolrangko bikotna jotton ka·enga ine adita salrangna skangsan, Opposition dolni dilgipa Mukul Sangma-ba parakatahachim.
Sangma-ni aganani gitade, iandakgipa manderang, niam gri koela badingenggipa manderangoniko bang·bea tangka paisarangko man·e silchidarerangko brena a·bachengengahachim.
