TURA: East Garo Hills a·jani Williamnagar jillao skatang garirangko donengani a·sel gari gorarang apchangket ong·rongengani gimin aro ja·achi re·ruraenggipa manderangba neng·nikanirangko chagrongna nangengani gimin Williamnagar jillani mongsonggipa biaprango gari park ka·aniko ba donaniko East Garo Hills a·jani Deputy Commissioner champengataha.
Deputy Commissioner-ni u·iatani gitade, Williamnagar Civil Hospital-oni Super Market rama bibraona, Soil Bazar jolo, MTC rama bibraoni Main Bazar-o be·en palgipa biapona aro Super Marker jolo manderang, gari gorarangko park ka·na ba donna man·jawaha.
“Ia biaprango skatang garirangko donengani a·sel garirangni apchangketaniko nikna man·engani gimin aro ja·achi re·ruraenggipa manderangba neng·nikanirangko chagrongna nangtokengani gimin kosako janapatgimin biaprango skatang garirangko donjachina u·iatenga,” ine East Garo Hills a·jani Deputy Commissioner Swapnil Tembe parakataha.