100 Bn BSF-ni gital campus-ko Bawegre-o songa

TURA: 100 Battalion Border Security Force (BSF)-ni gital campus-ko West Garo Hills a·jani ning·o donggipa Bawegre songo songaha aro ia gital campus-ko Bristibar salo BSF Meghalaya Frontier-ni Inspector General Inderjit Singh Rana, nokdonggae on·angaha.
100 Bn BSF-ni gital campus-ko nokdonggae on·anganio SHQ BSF Tura-ni DIG Alok Kumar Singh, 100 Bn BSF-ni Commandant Ajay Kumar Singh aro gipin official-rangba dongpae bak ra·angaha.
Ia gital campus-ko nokdonggae on·angani somoio BSF Meghalaya Frontier-ni Inspector General Inderjit Singh Rana, jinmana aganprakangengon, 100 Bn BSF-ni gital campus-ko kulianio pilak nanga dakchakanirangko on·ahani gimin district administration aro jolo songdongenggipa manderangkoba mittelpilangaha.
Ia gital BSF campus-ara Baljek Airport-oni sambaon ong·ani gimin ia campus-ko kulianichi airport-na naljokaniko on·anisan ong·aigija songni nokni manderangna dingtang dingtang janggi tangani cholrangko on·na man·gnok ineba Rana aganaha.
Songni nokni manderangna an·seng baljokaniko aro pilak nanga dakchakanirangko on·na gita BSF dol raken kamko ka·enga ineba BSF Meghalaya Frontier-ni Inspector General parakataha.