RESUBELPARA: Damra-oni Bajengdoba-ona dakbagipa ramako tarianirang namen ka·sinengani gimin Mendipathar-ni Trinamool Congress (TMC) MLA Marthon Sangma, ia ramako tarienggipa Badri Rai & Company (BRC)-ko matnangatenba, ia ramako ta·raken matchotatchina a·dok sorkario dabiangaha.
Ia km 38 ong·gipa ramara, Assam Goalpara a·jao donggipa Damra-oni a·bachenge Damas, Mendipathar, Resubelpara gita Bajengdoba-ona dakbagipa rama ong·achim aro ian North Garo Hills a·jani manderangna mongsonggipa ramaba ong·engachim.
“Ia ramako BRC dol, bilsignina skangan tarina a·bachengahachim indiba iandake ka·sine tarigenchimode ia ramako dongimin somoi gita matchotatna man·jawa,” ine ia ramako re·baenggipa bilsion matchotatani ong·engachim ine Sangma parakataha.
Sangma-ni parakatani gitade, re·anggipa 2021 bilsini bon·angachibara ua ia ramani bidingo project engineer baksa agangrikon, ia ramani chu·gimik ‘earth work’-ko 2022 bilsini January jaode matchotgnok ine una ku·rachakaniko on·ahachim indiba da·onan Bajengdoba-oni Resubelpara-onasan mitam kamrangko matchotkuenga aro uaba chu·gimik kamrangkode matchotkujaengachim.
Koborko on·ani gitade, ia ramako bilsignini gisepon matchotatchina gita sorkari a·bachengode somoiko donahachim indiba ia ramako tarienggipa company-na sorkari bilsisa somoiko on·dapahachim.
“Ia company chingko cha·bokna jotton ka·enga maina ia ramako tarianio komibeoba sak 60-70-kode rakkienga ine uamang chingna aganaha indiba rama tarianiko nigenchimode sak 15 ba sak 20-mangni kam ka·anikosan nikna man·enga. Uamang JCB-koba bol 3 ba bol 4-mangsan jakkalenga. Indake kam ka·genchimode ia ramako da·o bilsisani gisepo matchotna man·chongmotjawa,” ine Mendipathar-ni MLA parakataha.
Ia ramani mitam bakrangkosan tarina a·bachengengkua aro km 20-na baten kamrang a·bachengna nangkuenga ineba Sangma parakataha.
MLA-ni parakatani gitade, Damra-oni Mendipathar-ona dakanggipa ia ramani bakan namjabatsranggipa bak ong·enga aro ia ramako gari gorarango re·ruragipa manderang bilongen neng·nikanirangko chagrongna nangtokenga.
Indake ong·engon, ia ramako somoi gita matchotatna man·na gita BRC-na raken ge·etaniko on·china ua a·dok sorkariko didiataha.
Damra-Bajengdoba ramako tariani ka·sinengani gimin TMC MLA matnanga
Date:
Share post:
