TURA: West Khasi Hills a·jani Nengchigen minggipa A·chik songo, silchidare ra·bitgipa manderangni dakchakanichi adita sak manderang, drae koelarangko bikotenga ine songni Nokma, Shallang police station-o badi ka·doangaha.
FIR-ko Nengchigen songni Nokma Kristina Marak, re·anggipa February-ni 14 tariko ka·aha aro uni FIR-o parakatani gitade, Alnet Mark, Clington Marak, Pandit Momin, Toban Marak, Nazim Ali, Lipson Momin aro Pangseng Sangma minggipa manderang, Nengchigen songni a·kingo drae koelarangko bikotenga.
Meghalaya a·doko niam gri koela bikotenggipa manderang, bobil dake chakatgipa dolrangko bikottaina cholrangko on·enga ine adita salrangna skangsan opposition dolni dilgipa Mukul Sangma-ba parakatahachim ine nikna man·a.
Indake ong·engon, kosako janapatgipa saksni manderang, silchidare ra·bitgipa manderangni dakchakanichi, Nengchigre a·kingo manderangko ka·mikkenate koelarangko bikotenga ine songni Nokma parakataha.
Ia jolrango niam gri koela bikotenggipa manderang, jolni police-rang baksaba jak donga aro uandaken jolni police-rangba koela salgipa truck garirangoniko trip-prakon gong 500/- ka·e ra·skaenga ineba Nokma Kristina Marak matnangataha.
Ia manderang, Rengchi, Rajagula aro Chimilam songo niam gri chalaienggipa check gate-rang baksaba nangrime kamko ka·enga ineba ua parakataha.
Nokmani FIR-o parakani gitade, ia songni mitam manderangko silchidare ra·bitgipa manderang ka·mikkenate, koela salgipa truck garirangoniko tangka gilna gitaba jakkalskaengachim.
“Iandake silchidare ra·bitgipa manderangni dakchakanichi koelarangko badingengani a·sel songni manderang mamingkoba dakna man·jaenga aro kenchipchipe dongtokna nangenga,” ine Nengchigen songni Nokma parakataha.
Meghalaya a·doko bobil dake chakatanirang ka·sinsin bon·angahaoba da·o niam gri koelarangko badingengani a·selan dingtang dingtang biaprango dakait dake ra·ani aro ma·manti dake so·sojengjeng ong·anirangko nikna a·bachengtaiengahachim.
