SHILLONG: Opposition All India Trinamool Congress (AITC), Titanic jahas jekai sripaha, ugitan sripangengjok. Titanic jahasde ice-o chatingesa sripahahim indiba AITC-de re·mikkangna skangan be·gruengengjok, ine NPP State president aro Rajya Sabha MP, Dr WR Kharlukhi aganaha.
“An·tangtangni manderangko apsan tom·dake donna man·jaode aro uamangni jahasan sripenga ong·ode sawamancha jahaso dongna sikgen? ine Kharlukhi aganaha.
‘NPP, an·tang baksa bakrimgipa dolrangko gimaatgen ba cha·minokgen ine AITC-ni matnanganina aganchakatengon, Kharlukhi indine aganaha, “NPP, darangkon nisiatjawa aro bakrimgipa dolrangko gimatjawa, sakgipinko agane roani palo, uamang an·tangtangko simsakna nangenga.”
AITC-ni MDC, jean mijaomangmang NPP-o napaha, uan AITC-o maming chol donggijako u·ienba ong·kataha. Garo Hills-oni MDC, an·tangan ia kattarangko aganenga, chanchiate nibo. Uni gimin NPP-na chanchiani palo an·tangna simsakbo. Maina na·simang bilsi 2023-o an·tangtangni mangrakani sakki sabitko on·na nangenga, unosa AITC, Meghalaya-o pangkamgenma iako u·ina man·gen, ine Kharlukhi aganaha.
NPP, AITC-ni MLA-rangko salna jotton ka·enga ine matnangako kakket ong·ja ine aganchake Kharlukhi indine aganaha, “AITC an·tangan, Congress-ni sak 12 MLA-rangko salangaha, indakonan sakgipinko maidake jaksi otna man·skaa.”
Uandake AITC-ni MLA-rang NPP-ona re·bana am·tokenga ine agangipa kattani gimin janapatengon, “somoi sokaon nikaigen,” ine aganataha.
Opposition Chief Whip aro AITC dilgipa, George V Lyngdoh, mni Sukrobar salo National People’s Party-ko, ‘NPP, partytang baksa bakrimgiparangko gimaatgen’ ine matnangaha.
