Shillong-Dawki ramako apalatna kam ka·ani ka·snenga

SHILLONG: Defence authority-rangni ong·gipa jolrangko tarina man·kujaomangba, Shillong-Dawki ramako four-lane tarienggipa project on·timintide be·en pil·baengaha.
Dolsa journalist-rang Sonibaro Umtyngngar-ona kingking songreange niaha aro project-ko jako ra·engaha ine nikna man·aha indiba kamrang namen ka·snenga ineba ma·sina man·aha.
Defence area-rangode adita bolrangko den·a galana agrede kam a·bachenganide dongsrangkuja ine aganoba gualani dongja aro ia area-o nirokgipa traffic personnel-rang dongjani gimin garirangni changket sikket dakanikoba nikna man·enga.
Indakeba nikatna man·a je km 71 bakrogipa NH-40-ko Shillongni Umshyrpi dolongoni 7th Mile, Upper Shillong-ni Baniun-ona four-lane highway dakna gita tik ka·manaha, jeon ia jolrango garirangni changket sikket dakaniko olgrokatna gita ia ramako tarianiko ta·rake matchotatchina gita a·dok sorkariko jetjetengachim.
Project-ni skanggipa package-ni ga·akgipa km 11 ong·gipa four lane ramakode December  2023-ona matchotgen ine ka·dongsoenga.
Prject-ni gnigipa package-na kam ka·anide Umtyngngar-ona kingkingan kam a·bachenganikon neng·edikesan nikna man·enga, unomitingo gnigipa package-koba December 2023-on matchotatna ka·dongsoenga.
Ia gong kror 1,251-ni road project-na Japanese International Cooperation Agency tangka paisarangko on·enga. Ia km 71 bakrogipa NH-40-ko Shillong-ni Umshyrpi dolongonin 7th Mile, Upper Shillong-ni Baniun-ona kingking four-lane highway dakatatgen.
Ia project-ni ning·on West Jaintia Hills-ni ning·ogipa Dawkio Umngot chibimako gital dolongko kabatgen.