SHILLONG: Adita salrang skangsan NPP-ni dilenggipa MDA sorkarina chakpaaniko parakatgipa sakbonga MLA-rangoni sakbri MLA-na a·dok sorkari, dingtang dingtang agency-rango Co-Chairman-ni post-ko on·aha.
Mni Bristibar salo sorkarini on·gipa notification-o janapani gita, Mohendro Rapsang aro PT Sawkmie- uamangna Meghalaya New and Renewable Energy Development Agency (MNREDA)-o co-chairman post-ko Category A+-ni ning·o perks aro gipin cholrangko on·aha.
Congress-ni sakbonga MLA-rang PT Sawkmie, Mohendro Rapsang, Apareen Lyngdoh, Mayrolborn Syiem aro Kimfa Marabaniang- uamang MDA sorkarina chakpaana parakataha.
Nongpoh-ni MLA Mayralborn Syiem-na Meghalaya Industrical Development Corporation (MIDC)-o Co-Chairman-ni post-ko on·aha. Kimfa Marbaniang-na Meghalaya Government Construction Company (MGCC)-ni Co-Chairman post-ko on·skaha.
Indiba Mayralborn Syiem -ko kobor ra·timgiparang sing·on, “sorkarini tik ka·giminko u·ija’ ine aganaha.
Kobor man·soani gitade, Malki-Laitumkhrah-ni MDC John Fantin Lakadong-ko MGCC-ni Vice Chairman songaha.
Uandake Ampareen Lyngdoh-na badiao mai post-ko on·gen iani gimin u·ikujaenga, iani bidingo Chief Minister baksa agangrikkuenga.