TURA: Skang chasongo a·song gimiko buring bolgrim dikbatsranggipa Garo Hills-o da·o buring bolgrimrangni porongrong ong·roroangengania mikkangchi a·gisi ong·na kenchakna nangbatgipa biap ong·skaengaha.
Garo Hills-ni bang·bata biaprangon a·dok sorkarini a·kanggimin buring bolgrimrangko man·chape pilak bolgrimrangon, manderang skatang bol-wa·arangko den·e palsrukengani gimin aro bagan barirangko dake cha·na buringrangko o·engani gimin buring bolgrimrango da·o porongrong ong·anikosan nikna man·engahachim.
East Garo Hills a·jani Rongjeng, Darugre aro Rongrenggre reserved forest-rangoba gipin biaprangoni aro mongsongbate Assam a·dokoni re·bae bol badingenggipa manderang baksa songni manderang an·tangtangan, ma·manti ostrorangko jakkale bol wa·arangko den·engani a·selan da·o porongrong ong·anikosa nikna man·engahachim. Ia buring bolgrimrangni mitam biaprangode manderang nokrangko rike songdong a·chatokskaengaha aro mitamrangde ia biaprango bijolirangkoba sringbae dongna man·tokengahachim.
Rongrenggre reserved forest-o bolrangko skatang den·e palsrukengan baksana koelarangkoba niam gri bikotengani a·selan sorkarini kange dongimin buring bolgrimrangni porongrong ong·anikosa nikna man·skaengaha. Ia biaprango niam gri bikotenggipa koela a·kolrangko sorkari official-rang bilsiantian changni chang dape donatengoba, koela badingenggiparang, koelarangko bikote ra·engkua aro rakbatgipa niamrangko ra·gate ja·kuko de·kujaskalde iandake niam gri koela bikotaniko champengna man·kujanaba gnang.
North Garo Hills a·jaoba apsan daken, Kharkutta aro Chimunbanghi reserved forest-rango maderang skatang bolrangko pale cha·engani a·selan da·o ia buring bolgrimrangni porongrong ong·anikosa nikna man·engahachim.
North Garo Hills a·jani DFO Sathish K-ni u·iatani gitade, manderang ia buring bolgrimrango donggipa bol wa·arangko skatang den·e pale cha·enga aro mitamrangde ia buring bolgrimrangko an·tangtangni a·ana ine a·kangtokskaengahachim.
West Garo Hills a·jako niatskagenchimoba, bang·bata buring bolgrimrangon apsan dakgipa obostarangko nikna man·tokengaha aro buring bolgrimrangni porongrong ong·roroangengahani a·selan manderang chirangkoba man·na neng·skaengaha.
Iani bidingo district administration-ni gitaba changni chang niamrangko ra·gate, chiring chibisikrangko ripingna gita bol wa·a den·aniko champengatahaoba maming dingtanganiko nikna man·kujaenga aro batesa bilsiantian manderangni china dilani batroroangskaengahachim.
West Garo Hills a·jani a·kawe jolrango bang·en niam gri chalaienggipa saw mill ba bol ratani karkanarangko nikna man·enga aro Garo Hills-ni dingtang dingtang buring bolgrimrangoniko bolrangko ratenba ia saw mill-rangona ra·baskaengachim. Koborko on·ani gitade, New Hallidayganj-oni Tikrikilla-ona dakanggipa ramamangmangon dam 100-na baten niam gri chalaienggipa saw mill-rang donga aro ia saw mill-rangko niam gri chalaiengani a·selan Garo Hills-ni bol wa·arangko skatang den·a manderang palsrukatskaenga.
Forest official-rangni u·iatani gitade, ia saw mill-rangko chipe donatgenchimoba, adita salrangni gisepon kulipile chalaitairongaia aro uandaken niam gri chalaienggipa saw mill-rangko nirokanio bang·a neng·nikanirangko chagrongna nangenga.