SHILLONG: Adita salrangna skang, West Khasi Hills a·jani koela a·kol damsao mande sakgnini siangani ja·man ia koela a·kolni nokgipa Alfred Rongrin ba jekon Pek ineba mingachim, ia mandeko police-rang rim·na sandienga ine kobor on·aha.
Ia a·selni bidingo songbadrango seatani ja·man, Mawshynrut-ni Sub Divisional Police Officer (SDPO), am·sandianirangko dakna a·bachengaha aro ia a·selni bidingo suo moto case-ko ka·ahachim.
SDPO-ni am·sandianirangko dakon, Assam Boko joloni bilsi 35 ong·gipa Sukur Ali aro bilsi 35 ong·gipa Ainuddin Ali, koela nokgipani ge·etaniko man·enba, Langmar-o donggipa koela a·kolona re·anggipa February-ni 16 aro 17 tarikrango re·angahachim ine ma·sina man·aha.
Ia mande sakgni, koela a·kolona re·angon, rang·sisokjae siangna gita nangaha ineba SDPO-ni am·sandianio ma·sina man·aha.
A·sel ong·ani ja·mano, police-rangna u·iatchenggija sianggipa mande sakgnini manggisiko uamangni ripengrang, uamangni nokona ra·angaha.
Ia koela a·kolni nokgipa Alfred Rongrin-ara Shallang jolo donggipa Kyllonmathei-oni ong·achim aro ua MMDR Act baksana National Green Tribunal-ni dongimin niamrangko pe·e, ia koela a·koloniko koelarangko bikotna jotton ka·engachim ine official-rang kobor on·aha.