SHILLONG: Meghalaya a·doko niam gri koelarangko bikote salruraenga ine matnangenggipani bidingo sakkirang donggenchimode FIR-ko ka·china ba sakkirangko mesokskachina gita Sonibar salo, National People’s Party (NPP)-ni state president WR Kharlukhi, All India Trinamool Congress (AITC)-ko ra·biangaha.
“Nokma-an FIR-ko ka·na man·a ong·ode, a·doko niam gri koela badingenga ine matnangenggipa manderangara maini gimin FIR-ko ka·na ba sakkirangko mesokskana man·jaenga?” ine NPP-ni state president aro Rajya Sabha-ni MP sing·doangaha.
Koela badinggipa aro bobil dake chakatgipa dolrangni gisepo meli-nangrime kamrangko ka·ani donga ine matnanganiara politics-ni gita chalakki dakanisan ong·aia aro pangnan politics-o iandake matnanggrikanirangkode nikna man·ronga ineba Kharlukhi jegalataha.
West Khasi Hills a·jani Nengchigen song jolrango silchidare ra·bitgipa manderangni dakchakanichi koela badinggipa manderang, niam gri koelarangko bikotdraenga ine Nokma Kristina Marak-ni FIR ka·doanggipani gimin janapatengon, iani bidingo a·dokni Acting DGP Idashisha Nongrang an·tangan, mokordoma ka·e am·sandianirangko dakengaha ine parakmanaha ine NPP-ni state president parakataha.
A·doko tangka jakkalsreta aro dingtang dingtang dake matnanganirangchi NPP-ni election-na tarisamsoanirango nangchakeani donggenma ine sing·on, “2023 bilsio an·ching mai ong·a pilakan nikna man·aigen. Damgittam Assembly constituency-ni by-election-ko ong·atna skangba apsan daken iandake matnanganirangko an·ching nikna man·aha indiba by-election-o chinga chu·sokgipa ong·aha,” ine Kharlukhi aganaha.
Meghalaya a·doko koela badinggipa aro bobil dolni gisepo nangrimani donga ine matnanganiranga maming gital katta ong·ja ine adita salrangna skangsan a·dokni acting DGP-ba aganahachim.