GHADC-ni bidingo sorkari baksa agangrikani chu·sokja ine NGO-rang a·kanga

TURA: Garo Hills Autonomous District Council (GHADC)-ni gital chief executive membor (CEM) Rakesh Sangma-ko ra·galpilchina dabie jingjengatanirangko dakengani a·sel GHADC-o kamrangko ka·na man·jaengani gimin Sombar attamo sorkarioni watatako man·e re·bagipa MLA-rang, dingtang dingtang NGO-ni dilgiparang baksa agangrikahaoba chu·sokgipa ong·na man·jaha.
Sorkarichipakni North Tura-ni MLA aro sorkarini advisor Thomas A Sangma baksana gipin sakgittam MLA-rang, dingtang dingtang NGO-rangni dilgiparangko Tura Circuit House-o gronge, jingjengatanirangko dontongchina mol·molahachim indiba GHADC-ni gital CEM Rakesh Sangma-ko ra·galkujana kingking NGO-rang, jingjengataniko dontongjana gita tik ka·angskaaha.
Sorkarini dilgiparang baksa tom·a matchotani ja·mano dingtang dingtang NGO-ni dilgiparang, GHADC office-ona re·bapile jegalenggipa manderang baksa dikdiksa tom·aniko ong·atangaha.
Ia tom·anio FKJGP Garo Hills zone-ni president Pritam Marak, jinmana aganprakengon, GHADC-ni gital CEM-ko ra·galpilani bidingo chanchitaina gita sorkari salgittam somoiko ra·angaha indiba gital CEM Rakesh Sangma-ko ra·galkuja dipet jinma jegale jingjengataniko dontongkujawa ine parakataha.
“Rakesh Sangma-ko CEM songaonin chinga uni kosako jegalanirangko dakenga aro sorkarini salgittamna somoi ra·anio chingni jingjengatanikode dontongna agansrangjachina chinga sorkarini dilgiparangko aganaha. Rakesh-ko CEM ong·aoniko chu·gimik ra·galaha ine chingna parakani ja·manosa chinga jingjengatanikode dontongna man·aigen,” ine Marak parakataha.
Indake ong·engon, sorkarini dilgiparangko gronganio NGO-rang, mingbri dabianiko chu·sokatchina gita sorkario dabiaha ine GSU-CEC-ni president Tengsak Momin parakatskaaha.
“Pangnan da·o gita maiba nanganina jegalanirangko dake jingjengataniko dakon sorkari, dilgiparangko Shillong-ona okamate, salsa salgnini gisepon chu·sokatgen ine ku·rachakmike bon·chipatronga indiba ia changode chinga jatni namgninasa dakgrikengani gimin mikaoa gnang kamko ka·enga aro maming dakeba sorkarina bame on·jana tik ka·aha. Chinga ia tom·anio mingbri dabianiko chu·sokatchina sorkario dabiaha aro uan skanggipao Rakesh-ko CEM ong·aoniko ra·galna nanggen aro uni kam watanio soi ka·aniko chingna mesokna nanggen. Apsan daken ua MDC-rangko grongna nanggen aro MDC-rangba chingko grongna nanggen, ong·jaode bon·kamaode MDC-rangkode grongja ine pa·sikani kattarang ong·kattaigen. Gnigipao chingni dabianiara, GHADC-o kam ka·e ra·galako man·gipa pilakkon kamo ra·pilna nanggen, gittamgipao GHADC-o kam ka·enggiparangna dormaharangko name on·na nanggen aro brigipao Garo Customary Law (GCL)-ko ra·gatan baksana GHADC election-o gipin jatrang bak ra·pana man·jana gita ta·raken niamko ra·gatna nanga ine chinga dabienga,” ine GSU-ni president Momin parakataha.
NGO-ni dilgiparangko gronganio North Tura-ni MLA baksa dongpagipa gipin MLA-rangara, sorkarini chief whip aro Williamnagar-ni MLA Marcuise Marak, Resubelpara-ni MLA aro Assembly-ni Deputy Speaker Timothy D Shira aro Rongara-Siju-ni MLA Rakkam A Sangma ong·achim.