SHILLONG: Robibar saloni Sombar salona konta 24-ni gisepo Meghalaya a·dok gimiko sak 11 manderang COVID-19 man·daptaiaha aro ia apsan salon a·doko mande sakgittam COVID man·e siangdaptaiaha.
Konta 24-ni gisepo COVID-19 man·dapgipa sak 11 manderangko channe da·o Meghalaya a·dok gimiko COVID-19 man·e dongenggiparang sak 343 gapaha aro ia apsan salon mande sakgittam COVID-19 man·e siangdaptaiahani gimin a·dok gimiko COVID man·e sianggiparangara gimik sak 1571 gapskaengaha.
Konta 24-ni gisepo COVID man·gipa sak 11 manderangoni, sak 1-de East Garo Hills-o, sak 3-de East Jaintia Hills-o, sak 5-de East Khasi Hills-o aro sak 2-de Ri Bhoi a·jao ong·a.
Salsani gisepo COVID man·e sianggipa mande sakgittamoni saksade East Jaintia Hills-o aro sak 2-de East Khasi Hills a·jao ong·a.
Ia apsan salon gimik sak 37 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 91,390 gapskaengaha.
